月度归档： 2026 年 6 月

Тээвэр хөгжлийн банк болон Монгол Улсын Их Сургуулийн Бизнесийн сургууль боловсрол, хүний нөөцийн хөгжил, судалгаа шинжилгээ, инновац болон салбарын мэргэжлийн боловсон хүчнийг бэлтгэх чиглэлээр хамтын ажиллагааны санамж бичиг байгууллаа.

Санамж бичигт Тээвэр хөгжлийн банкийг төлөөлж Гүйцэтгэх захирлын орлогч Э.Мөнхжаргал, МУИС-ийн Бизнесийн сургуулийг төлөөлж Бизнесийн сургуулийн захирал, профессор Н.Батнасан нар гарын үсэг зурсан бөгөөд уулзалтад МУИС-ийн Бизнесийн сургуулийн салбар эрхэлсэн захирал, профессор М.Должин болон хоёр байгууллагын холбогдох албан тушаалтнууд оролцлоо.

Хамтын ажиллагааны хүрээнд талууд оюутан, төгсөгчдийн мэдлэг, ур чадварыг хөгжүүлэх, ажлын байранд шаардлагатай практик чадварыг эзэмшүүлэх, үйлдвэрлэлийн дадлага, мэргэжлийн сургалт, судалгаа шинжилгээ, төсөл хөтөлбөрүүдийг хамтран хэрэгжүүлэх, банк, санхүүгийн салбарын хүний нөөцийг бэлтгэх, чадавхжуулах чиглэлээр олон талт хамтын ажиллагааг өрнүүлэхээр төлөвлөлөө.

Мөн оюутнуудыг бодит ажлын орчинтой эрт танилцуулах, салбарын шилдэг туршлагаас суралцах, мэргэжлийн чиг баримжаа олгох, карьер төлөвлөлтийг дэмжих, судалгаа, инновацын ажлуудыг хамтран хэрэгжүүлэх замаар их сургууль, бизнесийн байгууллагын хамтын ажиллагааны үр өгөөжийг нэмэгдүүлэхэд онцгойлон анхаарч ажиллах юм.

Тээвэр хөгжлийн банк нь хувь хүний чадвар, боловсролыг тогтвортой хөгжлийн суурь хүчин зүйл гэж үздэг бөгөөд ирээдүйн чадварлаг боловсон хүчнийг бэлтгэх, залуу мэргэжилтнүүдийг дэмжих, мэдлэгт суурилсан эдийн засгийн хөгжилд хувь нэмрээ оруулах зорилтын хүрээнд боловсролын байгууллагуудтай хамтын ажиллагаагаа өргөжүүлэн ажиллаж байна.

Монгол Улсын Засгийн газар болон Монголын Үндэсний Худалдаа Аж Үйлдвэрийн Танхимаас улсынхаа нийгэм, эдийн засгийн хөгжилд бодитой хувь нэмэр оруулж буй ТОП-100 аж ахуйн нэгжийн жагсаалтад Тээвэр хөгжлийн банк 4 дэх жилдээ дараалан шалгарч, улсын төсөвт нийт 21.7 тэрбум төгрөгийн татвар төвлөрүүлэн, санхүүгийн салбарын тэргүүлэгч байгууллагуудын нэг болохоо дахин баталгаажууллаа.

Тээвэр хөгжлийн банк нь Монгол Улсын эдийн засгийн гол хөдөлгөгч хүч болж буй ТОП 100 аж ахуйн нэгжээр дахин шалгарсан нь тухайн жилийн борлуулалтын орлого, улсын төсөвт төвлөрүүлсэн татвар, нийгмийн даатгал төлсөн ажиллагсдын тоо, ашигт ажиллагаа болон хөрөнгийн хэмжээ зэрэг үндсэн шалгуур үзүүлэлтүүдийг амжилттай ханган ажилласныг бататгаж байна. Энэхүү амжилт нь банкны тогтвортой өсөлт, санхүүгийн чадавх, хариуцлагатай үйл ажиллагааны үр дүн төдийгүй урт хугацааны хөгжлийн стратеги тууштай хэрэгжиж буйн тод илэрхийлэл юм.

2026 оны 3 дугаар сарын 31-ний өдрийн байдлаар Тээвэр хөгжлийн банкны бусдаас татан төвлөрүүлсэн харилцах, хадгаламжийн үлдэгдэл өмнөх оны мөн үетэй харьцуулахад 91 хувиар өсөж, 1.4 их наяд төгрөгт хүрсэн байна. Нийт хөрөнгө мөн хугацаанд 102 хувиар өсөж, 2.3 их наяд төгрөгт хүрчээ.

Мөн банк нь зохицуулагч байгууллагаас тогтоосон зохистой харьцааны шалгуур үзүүлэлтүүдийг бүрэн ханган ажилласан бөгөөд төлбөр түргэн гүйцэтгэх чадварын харьцаа үзүүлэлт 45.3 хувь, өөрийн хөрөнгийн зохистой харьцааны үзүүлэлт 18.8 хувьд хүрсэн буюу шалгуур үзүүлэлтийг 6.8 хувиар давуулан биелүүлсэн нь банкны салбарт тэргүүлэх үзүүлэлтэд тооцогдож байна.

2025 оны онцлох үйл явдлуудаас дурдвал:

1. Олон улсын нэр хүндтэй Global Banking & Finance Review сэтгүүлээс “Монгол Улсын Шилдэг Хувийн Банк 2025” шагналыг хүртэж, олон улсын хэмжээнд хувийн банкны үйлчилгээний стандартыг шинэ түвшинд хүргэснээ бататгалаа.
2. Монгол Улсын хөгжлийн төлөвлөгөөнд багтсан дэд бүтцийн төслийг дэмжих бондын үйл ажиллагаанд үндсэн андеррайтераар анх удаа ажиллаж, бондын зорилтот санхүүжилтийг амжилттай татан төвлөрүүллээ.
3. АНУ-ын тэргүүлэгч ТОП 5 банкны нэг болох BNY Mellon банкны шалгуурыг амжилттай давж тус банкны New York дахь төв салбарт ам.долларын клирингийн дансаа амжилттай нээлээ.
4. БНХАУ-ын хил дамнасан юанийн төлбөр тооцооны үндсэн систем болох (CIPS)-д Шууд оролцогчоор элссэн Монгол улсын төдийгүй Зүүн хойд Ази дахь анхны арилжааны банк боллоо.
5. Олон улсын үнэлгээний “FitchRatings” агентлагаар зээлжих зэрэглэлийн үнэлгээгээ шинээр тогтоолгон хэтийн төлөвөө  “Тогтвортой” болгон ахиуллаа.

Тээвэр хөгжлийн банкны энэхүү амжилт нь харилцагчид, хөрөнгө оруулагчид, түнш байгууллагуудын итгэлцэл, нийт ажилтнуудын мэргэжлийн ур чадвар, хамтын ажиллагааны үр дүн төдийгүй Монгол Улсын эдийн засгийн хөгжил, санхүүгийн салбарын тогтвортой өсөлтөд оруулж буй бодит хувь нэмрийн илэрхийлэл билээ.

Бидэнд итгэл хүлээлгэсэн харилцагчид, хамтран ажилладаг түншүүддээ амжилт бүтээлийг хүсэн ерөөхийн зэрэгцээ банкны энэхүү амжилтыг хамтдаа бүтээлцэж буй хувьцаа эзэмшигч, төлөөлөн удирдах зөвлөл болон ажилтан, албан хаагч нартаа гүнээ талархал илэрхийлье.

Тээвэр хөгжлийн банк болон Шинжлэх ухаан, технологийн их сургуулийн Менежментийн сургууль хамтын ажиллагаагаа өргөжүүлэн хөгжүүлэх, банк, санхүүгийн салбарын хүний нөөцийн чадавхыг бэхжүүлэх, ирээдүйн мэргэжилтнүүдийг бэлтгэх чиглэлээр хамтын ажиллагааны санамж бичиг байгууллаа.

Санамж бичигт Тээвэр хөгжлийн банкийг төлөөлж Гүйцэтгэх захирлын орлогч Э.Мөнхжаргал, ШУТИС-ийн Менежментийн сургуулийг төлөөлж тус сургуулийн Сургалт, чанарын албаны дарга М.Банзрагч нар гарын үсэг зурсан бөгөөд талууд боловсрол болон банк, санхүүгийн салбарын уялдаа холбоог бэхжүүлэх, урт хугацааны тогтвортой хамтын ажиллагааны суурийг бүрдүүлж буйгаараа онцлог юм.

Хамтын ажиллагааны хүрээнд талууд банк, санхүүгийн салбарын хүний нөөцийн хөгжлийг дэмжих, оюутнуудыг ажлын бодит орчинд бэлтгэх, ажилтнуудын мэргэжлийн мэдлэг, ур чадварыг тасралтгүй хөгжүүлэх чиглэлээр хамтран ажиллана. Үүнд ажлын байранд суурилсан сургалт, үйлдвэрлэлийн болон мэргэжлийн дадлага, судалгаа шинжилгээний хамтарсан төсөл, салбарын чиг хандлага, инновацид суурилсан сургалт, хөгжлийн хөтөлбөрүүдийг хэрэгжүүлэхээр төлөвлөж байна.

Мөн оюутнуудын мэргэжлийн чиг баримжааг зөв төлөвшүүлэх, карьерын хөгжлийг дэмжих, сургалтын чанар, хүртээмжийг нэмэгдүүлэх, эрдэм шинжилгээ, судалгааны ажлыг дэмжих, сургалтын орчныг сайжруулах чиглэлээр олон талт санаачилгуудыг үе шаттайгаар хэрэгжүүлэх юм.

Тээвэр хөгжлийн банк нь хүний нөөцийн хөгжлийг байгууллагын тогтвортой өсөлт, өрсөлдөх чадварын үндэс гэж үздэг бөгөөд боловсролын байгууллагуудтай урт хугацааны, харилцан үр өгөөжтэй хамтын ажиллагааг тууштай хэрэгжүүлэн ажилладаг. Энэхүү хамтын ажиллагааны хүрээнд ирээдүйн банк, санхүүгийн салбарын мэргэжилтнүүдийг бэлтгэх, онол практикийн уялдааг бэхжүүлэх, салбарын мэдлэг туршлагыг боловсролын орчинтой холбох чиглэлээр бодитой хувь нэмэр оруулахыг зорьж байна.