Зохиогч: Nasantsatsral B

Б.Цэлмэг нь 2023 оны 11 дүгээр сарын 21-ны өдрөөс Тээвэр хөгжлийн банкны Гүйцэтгэх захирлын орлогч албан тушаалд томилогдон ажиллаж байна.

Тэрээр банк, санхүү, хөрөнгийн зах зээлд 15 жил ажилласан туршлагатай бөгөөд 2008 онд Ирланд улсад ЖэйПи Морган (JPMorgan) банканд хөрөнгө оруулалтын сангийн чиглэлээр татварын зөвлөх, 2016 онд Сүмитомо Мицүй корпорацид нисэх онгоцны лизинг, худалдааны чиглэлээр санхүүгийн менежер, 2018 онд Xас банканд санхүү удирдлагын газрын захирал, 2022 оноос Ашид Aссет хөрөнгө оруулалтын менежментийн компанид сангийн чиглэлээр хөрөнгө оруулалт хариуцсан захиралын албан тушаалд тус тус томилогдон ажиллаж байсан.

Б.Цэлмэг нь олон улсын мэргэшсэн нягтлан бодох зэрэгтэй бөгөөд Ирланд улсын Америк Коллеж Дублин их сургуулийг бизнес удирдлагын бакалавр зэрэгтэй төгссөн. Түүнчлэн Ирландын банкируудын холбооноос Юнивэрсити Коллеж Дублин их сургуулийн хөрөнгө оруулалтын сангийн удирдлагын, Ирландын хуульчидийн холбооноос нисэх онгоцны санхүүжилт лизингийн чиглэлээр диплом эзэмшиж тус тус мэргэжил дээшлүүлсэн.

М.Батмөнх нь 2023 оны 10 дүгээр сарын 16-ны өдрөөс Тээвэр хөгжлийн банкны Зээл хариуцсан захирал албан тушаалд томилогдон ажиллаж байна.

М.Батмөнх нь банк санхүү, уул уурхайн салбарт дунд болон ахлах түвшний удирдлагын багт 22 жил ажилласан туршлагатай. 2001 онд ХасБанканд Жижиг дунд бизнесийн зээлийн мэргэжилтнээр ажлын гараагаа эхлүүлж ХасБанкны салбар, Зээлийн удирдлагын газрын Зээл эрхлэх хэлтэс, Зээлийн эрсдэлийн удирдлагын хэлтэс, Тусгай актив, Иргэдийн банкны газрын Харилцагчийн үйлчилгээний төв, Харилцагчийн удирдлагын хэлтэс, Дата шинжилгээний хэлтэс, Иргэдийн банкны зээлийн үйл ажиллагааны газрыг удирдаж олон өөрчлөлт, шинэчлэлтийн төслүүдийг амжилттай хэрэгжүүлсэн.

М.Батмөнх нь 2001 онд МУИС-ын Эдийн засгийн сургуулийг Санхүү-эдийн засагч, мэдээлэл зүйч мэргэжлээр төгссөн. 2004 онд Бизнесийн удирдлагын магистр цол хамгаалсан. 2011-2013 онд АНУ-ын Висконсин Мадисоны Их Сургуулийн Банкны ахисан түвшний сургууль (GSB) төгссөн. 2016, 2018 онд ХБНГУ-ын Шпаркассе Банкны Академийн сургагч багшийн сургалтад хамрагдаж сургагч багш болсон. Монголын банк, санхүүгийн салбарт мэргэжлийн боловсролыг дээшлүүлэх зорилготой Шпаркассе банкны Олон Улсын хамтын ажиллагааны сан, Монголбанк болон Монголын банкны холбоо, Банк санхүүгийн академийн хамтарсан төслүүдэд зээлийн мастер сургагч багшаар ажилладаг.

Т.Максат нь 2023 оны 11 дугаар сарын 22-ны өдрөөс Тээвэр хөгжлийн банкны Хөрөнгө зохицуулалт хариуцсан захирал албан тушаалд томилогдон ажиллаж байна.

Т.Максат нь банк санхүүгийн салбарт 16 жил, гадаад валют, үнэт металлын арилжааны удирдлага, банкны хөрөнгө, санхүүгийн удирдлагын чиглэлээр ажилласан туршлагатай бөгөөд 2008 онд ХасБанкнаас ажлын гараагаа  Актив, пассивын менежер албан тушаалаар эхэлж, Дилер, Ахлах дилер албан тушаалыг хариуцан ажилласан бөгөөд 2020 оноос эхлэн Тээвэр хөгжлийн банканд удирдах ажилтнаар томилогдон ажиллаж байна.

Т.Максат нь 2004-2008 онд Худалдаа үйлдвэрлэлийн их сургуулийг Банкны эдийн засаг, нягтлан бодох бүртгэлийн чиглэлээр бакалаврын зэрэгтэй төгссөн, Люксембург улсын Засгийн Газрын хөтөлбөр хэрэгжүүлэг Санхүүгийн хөтөлбөр солилцооны агентлаг (Agence de Transfert de Technologie Financière)-ийн Мэргэшсэн дилер болон Хөрөнгө санхүүгийн удирдлагын сертификат, Германы Төв банк (Deutsche Bundesbank)-ны “Нөөцийн удирдлага” сэдвээрх туршлага солилцооны хөтөлбөрийн гэрчилгээ, Люксембургийн их сургуулийн “Хувийн банкны удирдлага”-ын 1-р түвшний сертификатыг тус тус эзэмшиж буй мэргэжлийн албан тушаалтан юм.

Монголын банкны холбооны дэргэдэх Хөрөнгө зохицуулалтын мэргэжлийн зөвлөлийн дэд дарга, Монголын үнэт цаасны арилжаа эрхлэгчдийн холбоонд Илтгэгч ажлыг хариуцан, дотоодын санхүүгийн зах зээлийн хөгжилд хувь нэмэр хүргэн ажиллаж байна.